തിരുവനന്തപുരം: വിദേശയാത്ര വിവാദമാക്കി മുന്‍ ചീഫ്‌ സെക്രട്ടറി ഇ.കെ. ഭരത്‌ഭൂഷണ്‍ തേജോവധത്തിനു ശ്രമിച്ചതായി സ്‌ഥാനമൊഴിയുന്ന ഡി.ജി.പി: കെ.എസ്‌. ബാലസുബ്രഹ്‌മണ്യം. തന്നോടു പക തോന്നാനുള്ള കാരണം എന്താണെന്ന്‌ ഇതുവരെ മനസിലായിട്ടില്ലെന്ന്‌ അദ്ദേഹം പറഞ്ഞു. നിശ്‌ചിത അവധിക്കുശേഷം അവധി നീട്ടിയ ദിവസങ്ങളിലെ ശമ്പളം തിരിച്ചുപിടിക്കാനുള്ള ചീഫ്‌ സെക്രട്ടറിയുടെ തീരുമാനം ഉത്തരവാദിത്വമുള്ള ഒരു ഉദ്യോഗസ്‌ഥനു ചേര്‍ന്നതായിരുന്നില്ല.
പോലീസിലെ ഉന്നത ഉദ്യോഗസ്‌ഥനായ തനിക്ക്‌ സാധാരണക്കാരനു ലഭിക്കുന്ന നീതിപോലും ലഭിച്ചില്ല. ഏറ്റവും അടുത്ത സുഹൃത്തായിരുന്നു ഭരത്‌ഭൂഷണ്‍. മാവോയിസ്‌റ്റുകളെ വെടിവച്ചുകൊല്ലുക എന്ന സമീപനം ദോഷം ചെയ്യും. ഇക്കാര്യത്തില്‍ പോലീസിന്റെ തീവ്രനിലപാട്‌ വിജയിക്കില്ല. മാവോയിസ്‌റ്റുകള്‍ ഭരണഘടനയെ മാനിക്കുന്നില്ലെങ്കിലും മാനസിക പരിവര്‍ത്തനത്തിലൂടെ അവരെ നല്ല വഴിക്കു കൊണ്ടുവരാനാകും.
വിവാദമായ നിഷാം കേസില്‍ ഇടപെട്ടിട്ടില്ല. തന്നെ വ്യക്‌തിഹത്യ ചെയ്യാന്‍ ശ്രമിച്ച പി.സി. ജോര്‍ജിനെയും തൃശൂര്‍ മുന്‍ കമ്മിഷണര്‍ ജേക്കബ്‌ ജോബിനെയും പ്രോസിക്യൂട്ട്‌ ചെയ്യാന്‍ അനുവദിക്കണമെന്നുള്ള അപേക്ഷയിന്മേല്‍ ഇതുവരെ സര്‍ക്കാര്‍ തീരുമാനമെടുത്തിട്ടില്ല. ഇക്കാര്യത്തില്‍ ദുഃഖമുണ്ട്‌. പോലീസിലെ ഒരു വിഭാഗം ഉദ്യോഗസ്‌ഥര്‍ തനിക്കെതിരേ ഗൂഢാലോചന നടത്തിയെന്നും അദ്ദേഹം പറഞ്ഞു.
.jpg)
