* കാബേജ് അരച്ചു ഞെക്കിപ്പിഴിഞ്ഞ നീര് മുഖത്തു പുരട്ടുന്നത് ചര്മത്തിന്റെ യുവത്വം നിലനിര്ത്താന് സഹായിക്കും. മാത്രമല്ല, കാബേജ്നീരിനു ചര്മത്തിന്റെ ഈര്പ്പം നിലനിര്ത്താനുള്ള കഴിവുണ്ട്. ഇത് കോശങ്ങളുടെ പ്രവര്ത്തനത്തെ ത്വരിതപ്പെടുത്തുന്നു.
* തേന് മുഖത്തു പുരട്ടി പതിനഞ്ചു മിനിറ്റിനു ശേഷം ചൂടുവെള്ളത്തില് മുക്കിയ പഞ്ഞിക്കഷണം കൊണ്ടു തുടച്ചു മാറ്റുക. ചര്മം മൃദുലമാകും.
* മുഖക്കുരുവും മുഖത്തെ കറുത്ത പാടുകളും മാറുന്നതിന് വെള്ളരിക്കാനീരും തേനും യോജിപ്പിച്ചു പുരട്ടുക.
* തക്കാളിനീരു മുഖത്തു പുരട്ടിയാല് മുഖത്തെ അഴുക്കു മാറുകയും നിറം വര്ധിക്കുകയും ചെയ്യും.
* നാലു വലിയ സ്പൂണ് മോരും രണ്ടു ചെറിയ സ്പൂണ് തക്കാളി നീരും തമ്മില് യോജിപ്പിച്ചു മുഖത്തു പുരട്ടുക. അരമണിക്കൂര് കഴിഞ്ഞു കഴുകുക. വെയിലേറ്റതു മൂലമുള്ള കരുവാളിപ്പു മാറാന് ഇതു സഹായിക്കും.
* കാരറ്റ് ഗ്രേറ്റ് ചെയ്ത ശേഷം പിഴിഞ്ഞു നീരെടുക്കുക. ഇതു ചര്മത്തില് പുരട്ടുക. ചര്മത്തിന് ഭംഗി നല്കുകയും ചര്മത്തിന്റെ ഇലാസ്തികത മെച്ചപ്പെടുത്തുകയും ചെയ്യും.
* കാരറ്റ് അരച്ചതു മുഖത്തു പുരട്ടുന്നതു മുഖത്തെ കറുത്ത പാടുകള് മാറാന് സഹായിക്കും.
* എണ്ണമയമുള്ള ചര്മത്തിന് അനുയോജ്യമായ ടോണര് ആണ് ആപ്പിള്. ആപ്പിള് കനം കുറച്ചു വട്ടത്തില് അരിഞ്ഞ ശേഷം ഫ്രിഡ്ജില് വച്ചു തണുപ്പിക്കുക. ഇതു മുഖത്തു പതിനഞ്ചു മിനിറ്റ് വച്ച ശേഷം മുഖം കഴുകുക.
* നാരങ്ങാനീരും മഞ്ഞളും യോജിപ്പിച്ചു പുരട്ടുക. ചര്മത്തിന്റെ നിറം വര്ധിക്കും.
* കൈമുട്ടുകളിലെ കറുപ്പകറ്റാന് ചെറുനാരങ്ങ രണ്ടായി മുറിച്ച് അവയില് പഞ്ചസാര വിതറി അവിടം കൊണ്ട് കൈമുട്ടുകളില് ഉരസുക. ആദ്യം ക്ലോക്ക്വൈസായും പിന്നീട് ആന്റിക്ലോക്ക്വൈസായും ഉരസണം. കറുപ്പുനിറത്തിന്റെ കാഠിന്യം കുറഞ്ഞ് ചര്മം മയപ്പെടും.
* മുഖചര്മം വരണ്ടാല് മുഖത്ത് നല്ലെണ്ണ കൊണ്ടു തടവുക. അരമണിക്കൂറിനു ശേഷം കഴുകിക്കളയുക. നല്ലെണ്ണ ചര്മത്തിനു തിളക്കവും മിനുസവും നല്കും.
* കൈകളില് നല്ലെണ്ണ പുരട്ടി താഴേക്കു തടവിയാല് കൈകള്ക്കു ഭംഗി വര്ധിക്കും. വിരലുകള് മിനുസമുള്ളതും ചുളിവില്ലാത്തതും ആകും. നല്ലെണ്ണ പുരട്ടി തടവിയാല് കാലുകള്ക്കും ഭംഗിയും കൂടും.
* റോസാദളങ്ങള് ഇട്ടുവച്ച വെള്ളം കൊണ്ടു മുഖം കഴുകിയാല് മുഖം സുഗന്ധമുള്ളതും മൃദുവും ആയിത്തീരും.
* ബാര്ലി പൊടിച്ചതും രണ്ടു ചെറിയ സ്പൂണ് നാരങ്ങാനീരും അല്പം പാലുമായി ചേര്ത്തു മുഖത്ത് മാസ്ക്കായി ഇടുക. മുഖത്തെ രക്തചംക്രമണം കൂടാന് ഇതു സഹായിക്കും.
* ഒരു വലിയ സ്പൂണ് തേനും ഒരു മുട്ടവെള്ളയും ഒരു ചെറിയ സ്പൂണ് ഗ്ലിസറിനും കുറച്ചു ബാര്ലി പൊടിച്ചതില് ചേര്ത്തിളക്കി കൈയിലും മറ്റു ചര്മഭാഗങ്ങളിലും തേയ്ക്കുക. അരമണിക്കൂറിനു ശേഷം കഴുകിക്കളയാം.
* രണ്ടു വലിയ സ്പൂണ് പഴുത്ത പപ്പായയും ഒരു വലിയ സ്പൂണ് ചെറുചൂടുവെള്ളവും യോജിപ്പിച്ച് മുഖത്തു തേച്ചു പിടിപ്പിക്കുക. പതിനഞ്ചു മിനിറ്റിനു ശേഷം ചെറുചൂടുവെള്ളത്തില് കഴുകുക.
* പഴുത്ത പപ്പായ ഉടച്ചതു മുഖത്തു തേയ്ക്കുന്നത് മുഖത്തെ കറുത്ത പാടുകള് മാറി നിറം വര്ധിക്കാന് സഹായിക്കും.
* മുന്തിരിങ്ങയുടെയോ തണ്ണിമത്തന്റെയോ ചാറോ പള്പ്പോ മുഖത്തു പുരട്ടിയാല് ബ്ലാക് ഹെഡ്സും മുഖക്കുരുവും മാറുന്നതാണ്.
* മുഖത്ത് കറുത്ത പാടുകള് ഉള്ളയിടത്ത് ഉരുളക്കിഴങ്ങ് കനം കുറച്ച് അരിഞ്ഞതു വയ്ക്കുക. ഇത് പതിവായി ചെയ്താല് പാടുകള് മാറിക്കിട്ടാം.
* ഏത്തപ്പഴം ഉടച്ച് അതില് തേനും ചേര്ത്തു കുഴമ്പു രൂപത്തിലാക്കി പതിവായി പുരട്ടിയാല് പ്രസവാനന്തരം വയറിലും തുടയിലുമുണ്ടാകുന്ന സ്ട്രെച്ച് മാര്ക്കുകള് മാറുന്നതാണ്.
* തിളപ്പിക്കാത്ത പാല് മുഖത്തു പുരട്ടി മസാജ് ചെയ്ത ശേഷം കഴുകിക്കളയുക. ഇത് ചര്മത്തിലെ പാടുകള് അപ്രത്യക്ഷമാകുകയും ചര്മത്തിന്റെ തിളക്കം വര്ധിപ്പിക്കാന് സഹായിക്കുകയും ചെയ്യും.
* പാല്പ്പാടയില് ഒന്നോ രണ്ടോ തുള്ളി നാരങ്ങാനീരു ചേര്ത്ത് മുഖത്തു തേച്ചു പിടിപ്പിക്കുക. ഇത് ചര്മത്തിന്റെ ഭംഗി വര്ധിപ്പിക്കും.
* മുഖത്തുണ്ടാകുന്ന കറുപ്പുനിറം മാറുന്നതിന് പാലില് മുക്കിയ പഞ്ഞി കൊണ്ടു മുഖം തുടച്ചാല് മതി.
* മഞ്ഞളും പാലും കൂടി യോജിപ്പിച്ച ശേഷം മുഖത്തു പുരട്ടി ഉണങ്ങിയ ശേഷം കഴുകിക്കളയുക. ഇതു മുഖത്തെ രോമവളര്ച്ച കുറയ്ക്കും.
.jpg)
